ഇന്ത്യൻ കലാചരിത്രത്തിലെ വലിയ വിച്ഛേദങ്ങളിലൊന്നായിരുന്നു കൊച്ചി-മുസിരിസ് ബിനാലെ. ഗ്യാലറികളെ ആശ്രയിച്ച് നിലനിന്നിരുന്ന ലളിതകലയെ കാണികളുമായുള്ള സജീവവും സംവാദാത്മകവുമായ ബന്ധത്തിന്റെ അടിസ്ഥാനത്തിൽ പുനരവതരിപ്പിക്കുന്ന നൂതനമായ കലാ സംസ്കാരത്തെ അവതരിപ്പിച്ചത്‌ കൊച്ചി-മുസിരിസ് ബിനാലെയാണ്‌. അതുകൊണ്ടു തന്നെ കേവലമായ പ്രദർശനയിടം എന്നതിലുപരി സമകാലിക കലയുടെ പ്രയോഗ സ്ഥാനവും തൊണ്ണൂറുകൾക്കു ശേഷം ഇന്ത്യയിൽ രൂപപ്പെട്ടുവന്ന ആധുനികാനന്തര കലാസംസ്കാരത്തിന്റെ അനുഭൂതിസ്ഥാനവുമായി ബിനാലെയെ മനസ്സിലാക്കാം. സമകാലിക കലയുടെ രൂപപരവും പ്രത്യയശാസ്ത്രപരവുമായ അനുഭവങ്ങളെ സംവേദനം ചെയ്യുന്നതിനോടൊപ്പം പുതിയൊരു കാഴ്ചസംസ്കാരത്തെയും കാണിലോകത്തെയും സൃഷ്ടിച്ചുവെന്നതും കൊച്ചി-മുസിരിസ് ബിനാലെയുടെ പ്രത്യേകതയാണ്. കൊച്ചി മുസിരിസ് ബിനാലെയുടെ രൂപീകരണവും കേരള സമൂഹത്തിൽ അവ പ്രവർത്തിക്കുന്ന രീതിയും പഠനവിധേയമാകുക എന്നാതാണ് ഈ മൊഡ്യുളിന്റെ ലക്ഷ്യം.
